Login

Pin It

Poesia di Ferdinando Russo
'O guardaporta

Si parle p''o quartino 'o primmo piano,
se', state frisco! Magne 'e grasso, magne!
«Aggie pacienza!» dice 'on Ciccio Alfano.
Aggie pacienza, e ssongo tre compagne!

Vaie 'o siconno, addò sta 'o capitano,
t'ha da dà quatto mise, e po' se lagne
ca puzza 'o scisto... E comme fa 'o tuscano!
E quann' è 'a sera vo' chi l'accumpagne.

Addò l'appoia, sta sbafantaria?
Fa 'o nobbele, 'o sbruffone, e po' s'abbotta
de pulenta, fasule e baccalà...!

Saglie cchiù ncoppa, addu donna Maria?
Te ne vaie a ccascetta! E ncoppa, e sotta,
e addo' t'avuote, ccà nc'è da crepà! 

Dint''o «Sebbeto» 
I
(primma 'e s'aizà 'o telone)

Musicaaa!... Musicaaa!... Ciccì, salute!
Salutammo! Sunate, prufessò!
Prufessò, prufessò!... site nzurdute?
Nuie 'e ppavammo, sti ri' sorde, o no?

Tu guarda sti tre viecchie nzallanute! 
Tuoste e rusecarielle!  Guè, Tatò!
Nu sordo 'e franfellicche... E ccu salute!
'O cappelluccio nuovo, zi Nicò?

Musicaa...!  Nuie vulimmo 'Un t'o fa fa!
Nonzignore, Ciccì! Basta ca po'!
Vulite, o nun vulite accummincià?

Ri' cientèseme! È doce, 'a paparella!
Ah, bene!.,. bene!... Bravo, prufessò!
Chesta canzone è overamente bella!

II

Bisse, bisse! Vulimmo 'a Bbeatrice!
'A serenata int' 'o Buccaccio! Se'!
Gnorsì! Pe tte mme so' fatto n'alice!
'A vulimmo! Sunate, scorze è zè! 

Sti figli 'e porca! Don Gennà, che ddice,
'a sunammo?... Vattenne! Ma cherè! 
Lass' 'e ccantà!... Salute a chist'amice!
Bonanotta!... Acccurdate, don Viciè!

Chiòvano torze 'a copp' 'a picciunara!
Don Gennà! Ma si' ttuosto? E jammo bello!
Cuntentammo a sti figlie de janara!

Ah! Mo' 'iza 'o telone Pascariello...
Meglio accussì!...
«Meschino!... Sol nel bosco,

 di nottetempo... con quest'aere fosco...!»

III

(zitto zitto)

Chisto chi è? Nu turco, nun 'o vire?
Grazioscèllenza! 'O ssaccio; ma chi è?
'I quant' è brutto!... Zitto! 'I quant' è nire!
È nu mago? Gniernò! Se po' sapè?

«O buon Macon! Ora che far? che dire?
La buona via perdei... eh, eh, eh, eh!...»
Curiuso! Guè, chisto chiagne e rire!
Guè, primma se lamenta e po'... cherè?

Chillo 'a canosce, 'a strata! Vo' fa fenta!
Nun te n'adduone ch'è nu traritore!
Che brutta razza! Quant'è malamenta!

Mo' t' 'o scinne, se', se'!...
«Oh sul mio core!

 

Sul mio Macon! Da l'ime fondamenta
vo' far crollare il tempio del Signore!»

Pin It

Commenti