Poesia di Ferdinando Russo
Mmocc' 'a porta
Dicimmela comm'è! Donna Maria
è bona canusciuta, int"o quartiere!
Sempe ha avuto che fa' e' a pulezzia,
e chesto 'o ssano, rinto 'e Ventagliere!...
Chello c'ha fatto mmiez'a chella via!...
V"o ppo' cuntà don Ciccio 'o cafettiere...
Mmasciate, appuntamente... Uh mamma mia!
S'accummenciaieno a fa'... mali penziere!
Sberressa 'e primma fila! A poco a poco,
ogge ch chisto, n'auto juorno n'ato,
'a vesta, 'o muccaturo , 'e stivalette...
C'avisseve penzato?... Eccoce lloco!
Perciò s'appiccecaie c' 'o nnammurato,
ca 'o juorno appriesso Fungio l'accerette.
II
Arrestano a stu Fungio. Va appuranno,
chella sfacciata nce facev' 'ammore!
Ma nun era passato manco n'anno,
e pure p'essa stutano a Totore!
Tanta fatte po' cierte nun 'e ssanno!
Ma si sapissev'io che tengo 'ncore!
Chist' uocchie ccà, hanno visto ncopp"o scanno
r'o Tribbunale, a figliemo 'o pittore!...
Sta bona pezza, l'aggio ncucciat'io,
na sera mmerzo l'unnece a Tuleto,
vutà p' 'e viche cu cierti sturiente...
Nu cchiù!... Cummà, pe quant'è certo Ddio!...
Ne teneva tre nnanza, e quatto 'a reto!
Scavemento 'e Pumpei r' 'o Cincuciente!
III
Accussì, seguitanno 'a malatia,
cappielle, vest"e raso, anielle d'ore....
Giesù! Giuseppe! Sant'Anna e Maria!...
Se faceva fa' luce 'a nu signore!...
Chist'auto po'!... Che se mmeretarria!?...
...lle mettette na casa 'o Fiatamore..
Int'a cammisa soia nun ce starria
manco pòllece... 'O ggiuro ncopp"annore!...
Ah mannaggia 'o Sissanta! È na scaienza!
'O munno s'è cagnato 'a dinto fore!...
Che nce vulite fa?! Santa pacienza!...
E cheste songo 'e ffemmene oggigiorne!
Quanno 'e vvedite troppo fa 'e ssignore,
cappielle e veste? Mpustature e corne!
