Login

Stella inattivaStella inattivaStella inattivaStella inattivaStella inattiva
 

Poesia di Ferdinado Russo
Tu duorme

Tu duorm, i’ vegli! E quanno sto scetat,
pecchè ‘a notte nun pozzo arrepusà,
te sonno e cu chist’uocchio affaticato
te veco dint’’o suonno smanià!

Che staje sunnanno, sciore ‘e passiona ?
Pozzo sperà? Pozzo sapè che d’è ?
No ! So’ pazzo! Perdoname ! Perdona !
I’ nun m’’o credo ca tu suonne a mme !

I’ nun m’’o credo ca tu me vuò bbene,
e, ‘a verità, nun ll’aggio maje creduto!
Ma penzo a stu Destino e a chesti ppene
e a chistu core, appriesso a te, perduto!

Duorme cuntenta, sciore mio d’ammore !
E quanno ‘o sole a ll’alba arriva a te,
te porta tutt’’o ffuoco ‘e chistu core,
ma nun fa nniente si nun pienze a mme !

Quanti vvote, tremmanno ‘e sta pazzia,
aggio tanto penzato ‘e te scurdà!
E quanti vvote, chest’anema mia
ha ditto a ll’uocchie mieje: Nun ‘a guardà!

Ma pe fà chesto, core mio d’ammore,
pe nun te suspirà, pe nun patì,
n’ommo, che t’ha fissato a tutte ll’ore
nun ha dda fà nient’ato : Ha dda murì !

Duorme! I’ te metto na curona ‘e rosa
ncopp’a sta fronte e a sti capille nire!
Duorme, nun me penzà ! Duorme, arreposa!
Tutt’’e spine ‘e tengh’io ! Tutt’’e suspire !

Voglio sunnà cu ll’uocchie apièrte ancora
e albanno juorno te voglio vedè
schiudere chella vocca arrobbacore
comm’a nu sciore ncopp’a nu bbuchè !

E voglio cadè stanco e affaticato
nun saccio addò, pe te putè sunnà,
cchiù bella de nu sciore ca è sguigliato,
ma cchiù crudele ‘e tutt’’e ‘nfamità !!

Commenti

Potrebbero interessarti