Poesia di Carlo Porta
Lacrem stee indree... no sbottii foeura, nò!
Lacrem stee indree... no sbottii foeura, nò!
Infin, s’el voeur andà sto sur Giovann
a somenà a Trevis i Tordorò,
ch’el resta pur servii, che l’è sò dann.
Piantà Milan per on Trevis? Ohibò!
Ghe mancava in Milan di bej tosann
de fagh ona donzenna de poppò
tant e quant poden fagh i Trevisann?
Lacrem, lacrem stee indree per caritaa
perché quell so pientann l’è on cert indizzi
ch’el gh’ha el pel in sul stomegh inscì faa;
e no me stupirev ch’el fuss capazz
de trovà in st’occasion de sposalizzi
i noster lacrem per lavass el cazz.
