Poesia di Carlo Porta
Coss'el voeur ezzelenza che responda
Coss’el voeur ezzelenza che responda:
ch’el diga quell ch’el cred che l’è patron,
e s’el ghe paress pocch damm del cojon
ch’el droeuva ona parolla pù redonda.
E che nol creda mai che me confonda,
che ghe patissa, o gh’abbia suddizion,
anzi deslengui de consolazion
compagn ch’el me fass re de Trabisonda.
Perché a damm del mincion l’è come on dimm
che sont in straa per guadagnà quell terna
che no quistraroo mai cont i mee rimm.
E deffatt vedend lu, che l’è pagaa
con tante milla lira dal Governa,
no me par che i cojon se tratten maa.
