Login

Pin It

napoli via toledo
Poesia di Eduardo De Filippo

Oje Pasca, Pasca ...

Oje Pasca Pasca ... si venuta nzista!
Cu chistu friddo te si presentata:
sta 'e buonumore sulo 'o farmacista,
ricca tavula tène apparicchiata.
Pasca 'e na vòta, ch' 'e puteche a festa ...
cchiù d', 'a gente strillaveno 'e crapette!
Folla p' 'e strade e sole p' 'e ffeneste:
a Pasca ce ngignavamo 'e pagliette.
Cu na rot' 'e cannone e cu na palla,
na trummett' a tracolla e nu tammuro,
c' 'a mantella menata ncopp' 'a spalla,
io me ricordo a Garibalde 'e burro ...
'A tromba se squagliava p' 'o calore
e 'a barba 'e Garibalde si strujeva.
Si t' 'o guardave pè nu pare d'ore,
vidive 'o generale ca chiagneva ...
Schiuppat' 'e viole, addor' 'e primmavera,
sole p' 'e ccase e sole p' 'e balcune.
Pareva juorno e s'era fatto sera ...
Ascèvano 'e ffamiglie ch' 'e guagliuone,
ascèvano p' 'o struscio e p' 'e vetrine:
a Tuleto restavano ncantate!
'A sera, tutte chilli magazzine,
c' 'a luc' 'e tanno erano mbrillantate.
Se sàpe, 'o munno cagna, e song' 'o primmo
a di ca chistu munno adda cagnà ...
ma 'o mes'Aprile è Pasca, e nuie sapimmo
ca 'o sole, quanno è Pasca, ce adda stà!

Leggi le più belle Poesie di Eduardo De Filippo

Eduardo De Filippo
Ti possono interessare le opere di Eduardo De Filippo

Pin It

Commenti